4 Nisan, 2025
0 Comments
2 categories
| Ertengı : Necdet ÖZEN |
| KERŞOKAY’DIN CILKISI |
| Evelki vakıtlarda Nogay avullarındın birevinde tögeregi kalavlı balaban korantadın işinde koyları, sıyırları, atları kapatılgan aranı; ayvanlarındın kış künlerinde ciyik tobanlarındın kuyulgan samanlığı; arpa biydayday şiylerdin kuyulgan ambarı; kış künlerinde arabalarındın tartılgan kakrası; er uldun balası bikesimen oturgan üş ayrı üyü; kartman kurtkadın oturgan üylerimen koranta kalkındın cıyılıp ötmek cegen askanası bar eken.Bu korantadın kart nenesindin atı Kökür Abay, kart atalarındın atı da Kerim Şokay eken. Kökür Abayman Kerim Şokay bek kartayganlar, Kökür Abaydın cası biraz kişkene bolgan üşün öz şaresin özü körse de Kerim Şokay alcıp esin coytabaslagan ama arada bir eski künleri esine kelgende, evelkilerdi biledi eken. Onun üştan arada bir baston tayağına tayanıp tentirmentir etip cürüp, coytulup keter, gene özü üydü tabıp kelir eken. Akşam ötmeğin cegen sora üydün üş ulu bikelerimen üylerine barıp catsa da bu ullardan bolgan balalar üylerine ketmiy nenelerimen dedelerindin oturgan üylerine cıyılırlar, Kökür Abay da onlardı tögeregine cıyıp, ertek aytar, ondan son balalar üylerine barıp catadı ekenler.Kökür Abay ertek aytkanda, Kerim Şokay da tapşanda catar, azakay esin coytup alcıgan üşün, bek aytuvlardı tuymaz eken.Bir kün gene Kökür Abay torunların tögeregine cıyıp, oturu ekende torunlarından birevi nenesine aylanıp:Dedemmen sen ne vakıt üy boldunuz? Kaytip yaşadınız? dep soraganda, Kökür Abay bılay dep anlatkan:Biz eveli Dobruca degen cerde oturur edik, üyerde de avulumuz bar edi. Köbünşek müsür eksek de dedenalar at beslep karar, ondan sora da şerlerge aketip satar ediler. Men o vakıtlar canı cetme kız edim. Dedeniz de menden 5 yaş üyken bir cas edi. Aldında bizim üyge deden cavşı ciberip sorattı, sora da meni ayttırdılar. Kısmet eken toyumuz bolup, onda üylendik. Avulumuzdun küntuvar betinde balaban bir tav bar edi. Bu tavdın bazı oy cerlerinde şayırlar bolgan üşün üyerde bek köp cılkı atı cayılır, onlardı da vaktı kelgende deden ketip tutar, minip karap aketip satar edi. Bizim bolgan avulumuz yavirlerge geşken üşün biz üyerde köp kalmay, bıyaka özümüzdün ak topraklarımızga köştük. En üyken ulum biyerde tuvdu. Deden cılkı atların bek süygen üşün atlarından en aruv eki argımaktı alıp biyaka akeldi. Kaynatam ölgen üşün bizde kaynanamman, üyken kayınlarım, bir de eltilerimmen papırga minip aldında İstanbul’ga, üyerden de şimdi cerlesken curtumuzga keldik. Dedendin akelgen atları ürep köbüydüler. Üylerimizdi, korantamızdı yasadık. Atalarınız tuvdu, Üylendiler, sora sizler boldunuz, bizde köbüydük. Dedenizdin atı Kerim bolsa da O, erkezlerdin işine cuvurgan, erkezlerge yardım etip, biraz da esiygen sora O’ga avuldakı erkez, Şokay dep ayttılar. Kerim Şokay demesi uzun bolgan üşün de kıska coldan Kerşokay dediler. Dedenizdin atı Kerşokay bolup kaldı. Devlet bizge tarla bedri, leşperlik yasap geşinip ketemiz işte dedi. Torunlarından birevi:Neniy dedi, Bizim atlarımız şimdilerde az, köp atlarga ne boldu? degen de, Nenesi:Atalarınız cetip işlerdi kolga algan son motorlar şıktı, atman leşperlik kalmadı, biz de atlarımızdı satayık bolduk ama attın birevin minmege dedeniz alıp tasladı, ana kalgan beş atımızdı paraman satmayman dep kıyışlanıp, avulumuzdun ereğinde bolgan Beylik degen tavdın işindeki bir şayırga aketip noktaların, cüvenlerin şeşip azat etip ciberdi. O vakıtlar özü kalgan atka minip ketip, onlardı körür edi ama şimdilerde iykki kartaydı, esin coymaga basladı, bek ketalmaydı dep aytkanda; üyde tapşanda uyklapyatkan Kerşokay turup oturdu:Men kartaymadım, menim atlarımda Dobrucadakınday köbüydü cılkı boldular, bek keşikmiy onlardı yene tutup akelip cuvurtup, terbiye etip, yene şerge aketip satayıkman, degen de, Kökür Abay O’ga aylanıp:Cat endigi, cılkı kayda, Sen kayda dep küldü.Torunlar üylerine kettiler, erten boldu. Koranta kalkı yene askanada cıyılıp, kelinlerdin pisirgen lakşa şorbadı iştiler, akaylar kırga ketti, kelinlermen Kökür Abay azbarda özlerindin işlerine basladılar. Akşam boldu, akaylar kırdan keldiler. Askanada koranta kalkı cıyıldı, akşam ötmeklerin ciyikte karadılar Kerşokay kelmedi. Kökür Abay torunlarından birevin ciberip:Dedendi şakır ötmekke kelsin dep ayttı. Kişkene bala ketip dedesindin oturgan üyüne kirip karadı: dedesi yok. Kelip dedesindin bolmaganın ayttı. Nenesi de:Üyle ötmeğin aketip berdim, cep cattı, kayaka ketken eken dedi. Üydün kalkı er yaka karasa da Kerşokay’dı tabamadılar. Pütün keşe avul kalkıman karadılar ya yene Kerşokay cok. Erten, kün tuvup ortalık carık bolganda, en üyken ulu, üyde minmek üşün asrağan atlarına mindi, cüvenin tartmay tasladı, kayaka dep sorganlarga da:Bu at meni, atamdın anavbir atlardı azat etip cibergen cerine aketir, atam belki üyerge ketkendir dep esimden geşedi dedi. Avuldan bazı caslarman, akaylar da motorlarındın ketken cerine gadar motorman, ondan sonra da cayav calpı colga tüstüler. At onlardı beylik tavındın argı cağında tüz bir şayırlıkka aketti.Şayırlıkta; cerden kaynağan bir kaynaktın basında elli gadar attın cıyılıganın, üyerdeki bir terektin astında kölgege oturgan bir karttın basında cas bir şal taydın tigilip turganın kördüler. Kasına ketip karasalar, bu kart Kerşokay’dın özü edi ama oturgan cerinde canın teslim etken. Tay da onun kasına kimsedi canastırmay turu.Kerşokay’dın ölüsün akelip cerlediler ama şayırlıkta bolgan atlarga tiymiy olay etip tasladılar. Soradan beylik şayırındın korucusu:Kerşokay tek tinevinge gadar atına miner, bazıda cayav kelip atlardı körüp keter edi, maga da kimsege biyerde cılkı bolganın, atlardın köbüygenin aytma sakın, dep tembilegen edi. Men de kimsege aytmadım ama biyerge kaytip keldi bilmiymen, dedi.Cılkıdakı atlardı olay etip tasladılar, onlarga kimse tiymedi. O künden son o şayırlıktın atı KERŞOKAYDIN CILKISI dep anılatagan boldu.08.0l.2008Necdet ÖZENAktepe (Rıpkıye) – Alpu – ESKİŞEHİR |