MAYLI KALAKAY
Selattin(köydekiler oga Çaliy diytagan ediler)o korantadın en kişkene ulu edi,kişkene bolgan üşünde kart atası onu bek süyer,oyga kırga aketseler Çaliydin atasıman eki şokasına darılır edi.Çaliydin özüde tiri kuru birazda kıtımır edi.Anasına meni erte turguz dep aytar,tan atkanda korantadın kalkıman barabar turur atasıman şokaları kırga ketmek üşün arabadı cekkende onlarga anavdı mınavdı aketip akelmege yardım eter,onlar kırga cönegen sora ötmegin cer,atalarındın şalışkan ceri cuvuk bolsa onlarga üyle ötmeği aketir edi.
O kün anası onu turguzmadı.Özü uykudan yandı,turup terezeden tısyaka karadı,kün tuvup Tospa bayırından bir arkan boyu köterilgen, avalar cıllı bolgan üşün ıstanıman köyleksesin emen kiyip üşküyden cuvurup şıktı,betin kolun cuvmay askanaga bardı.Anasıman eki cengesi er zamankınday ötmek aşıtıp üylege akşamga kamır pisiriyik bolupyatırlar.
-Meni nege erte turguzmadın dep anasına mugaydı.
Atanman şokların erte turup Tegeneklisıra dakı ızanda arpa şalmaga kettiler sende onlarga üylede kalakay aketiyiksin,özleri aketmediler biz kalakaylardı pisiriyikmiz,cuvurt akettiler ya cazma yasap cıllı cıllı cesinler dedik dep ayttı anası, Izan erekte bolgan üşün şalbiye di aketmiy aranga tasladılar oga minip ketersin dedi.O aralıkta kart atası keldi askanaga.
-O kişkene baladı erekke cibermeniz,aketalmaz dep aytsada kelinlermen barabar as pisiripyatkan nenesi de;
-Da birşiy etmez,akay boldu menim ulum aketir o,degenimen kart atası birşiy aytmadı.Çaliy karadı may kalakay pisirgenler ama akşamga taslamay erteden eki tepsi köbetede pisirgenler.
-Köbetelerdi erte pisirgensiniz akşamgaşek suvurlar cıllı bolmaz degende anasıda;
-Nenenmen,cengenalar barabar kıdırmağa ketiyikmiz keş kalayıktay bolsak akşamga azir bolsun dep erte pisirdik dedi.Çaliy aranga kirirp otlukka karadı şal biyedin cemi kalmağan,ayvandı aş taslayıklar dep öz özüne söylendi, şal biye kulunlağan üşün artında bir aylık tayı iyirşenlenip şıktı,taydı azgana süydü,askanadın aldına keldi.Kalakaydı bir sinige salıp şarşaptay bezge orap avzun tüyyüp baylaganlar.Biyege mindi,anası kalakaydı aldına saldı, Çaliy de kırga taman cönedi.Bavluk colundan ketiyim de bu vakıtta zerdaliler bolupyatkandır,bolgan soylarından cermen dep tüsündü.Ava da bek issi edi köydü azakay şıkkan sora kır şeşmedin basına keldi,bu şeşmedin suvu bek bol bolgan üşün onun cuvuğunda tömendeki tarlalardı suvlamaga avut yasaganlar,köydün balaları caz bolsa o ga kirip şobunur,caldarlar.Onlarga karadı,atından tüstü atıda aşıkkan üşün avuttun kenarındakı kavaklardın astı salkın emde cerde ösken otlar bar ağaşka attı bayladı.Otlap karnın toyguzsun,üylegede taga bar mende kirip biraz şobunayım dedi.Şobunupyatkan balalardın köbüsü özünden üyken balalar,caldayalmazsın kirme dep aytsalarda tınlamay kirip caldadı.Avutka kiryatkanda şeşingen cerindin kenarınada kalakaydı tasladı. Kalakaydı taslagan kavaklardın bolgan ceri avuttan tömende bolgan üşün bek körülmiytagan edi.Şobunup caldap şıgıp endi kiyinip ketiyik bolup kavaklardın astına kelgende karasa ne körsün ;
köydün simtik üş iti kelip maylı kalakaydı alıp karınların toyguzgan anyak bette calanıp yatırlar.İtlerdi kuvaladı ama kalakaydıda pitirgenler.Atasıman şokaları aş kalmasınlar ne aketiyim diyatkanda esine akşam üşün yasalgan köbete keldi.Şal biyege minip üylerine bardı,askanadın kapısı zaten kirtli bolmağan üşün aşıp kirdi,köbetedi sinisimen alıp atına mingenimen şabıp kırda şalışkanlardın kasına üylege cetkizdi.Akşamgaşek onlarman kırda kaldı,akşam üyge kaytıp keldiler.Kas kararmağa yakın onlardın aldından nenesimen anası,cengeleride keldiler.Atası,anasına
-Akşamga ne pisirdiniz dep soraganda, anasıda;
-Köbete yasadık degenimen, atası ;
-Çaliy men üyle üşünde kırga köbete cibergensiniz dep aytkanıman, Çaliy basına keliyklerdi anlap ketip törde oturgan kart atasındın aldına barıp oturdu.
-Biz sizge may kalakay ciberdik,köbetedi kayerden taptınız dep ayttı Çaliydin nenesi. Kart atasındın aldında oturgan Çaliy de üydeki bikelerge aylanıp ;
-İssi kündün astında kırda orak şalganlardı üylede aş taslamadım ama köydün simtik itleride issi künde aş kalmadılar dep külüp bolganlardı ayttı.Nene simen anası,eki cengesi öpkeleselerde kart atasındın aldında bolga üşün birşiy aytamadılar.
Necdet ÖZEN
Aktepe (Rıpkıye) Alpu-ESKİŞEHİR