NOGAY TÜRKÇESİ:

Til’im Nogay

Bir kisi kördüm, şırayı apak,
Soradım, El’im Nogay dedi,
Tokda akamda konuşıyak,
Tınladım, Til’im Nogay dedi.

Coluna şıktım erten erteşek,
Egipyatır edi eki cas keyşey,
Geşken collarına eki şeşek,
Kokladım, Gül’üm Nogay dedi.

Avulun kayda ayt bileyim,
Colum tüsgen sayın keleyim,
Adasganda oga kelip kalayım,
Bekledim, Col’um Nogay dedi.

Cibermem dedim vakıt keşedir,
Orunun üyümde bas köşedir,
Ak atam aytsan, atın neşedir?
Tokdadım, At’ım Nogay dedi.

Ata menim atım’da Mammet aşe,
Ötürük dünya’dan kelipte keşe,
Nasip bolsun bilsek, ömür neşe,
Okudum, Cıl’ım Nogay dedi

MEHMET TAŞKIRAN

http://www.nogayforum.com/index.php/topic,1694.0.html

AH

Cıpcıllı bir cel şarptı betime,
Sagıngan avulum betten,
Esitbek uşun cilagan seslerim,
Tutası sosu celde birikken.

Ayemdin duvası,atamdın azarı,
Şoşgadın cılavı,onmagandın nazarı,
Bolmasın avullarımız,cengil pazarı,
Bir bolmak endi bizge kerekken.

Bir yakta toy,bir yakta ağıt,
Kelde Nogaydı ekevine dağıt,
oturgan minderinizdin işi şapıt,
Kısık sesimmen bakıraman kane esitgen.

Tav bergenler tav bolgan könlü kişkiy,
künbatyatganda kölgesine karagan şipiy,
Üyken bolup okuganı aguv,söylegeni şibjiy,
Cavurnu calangaş,kabarsız taa suvuktan.

Ne salalar berildi bil,bu minareden,
Neşeleri karap kaldı,sınık terezeden,
Aşuvunu alır hak,bilki cegenlerden,
Herbirinin atıda NOGAY,kelmediler kuvuktan.

Men meni cavlap,özümdü kuvdum,
Amma hep duvrudun canında turdum,
Mıtba ciyenakam,mende NOGAY tuvdum,
Bir gayrım cok,cestandan,comboyluktan.

Cıynalsın Nogayım Karakura,Aginden,
Seker,Aboz,Kırkkuyu,Mandıra,Köstengilden,
Bir toy sıylanırediki kör,Siydametliden,
Ah turmasını bilseydiniz,sosu koltuktan.

Köküregin kerip kelyatganda Nogaylar,
Tentekden duvru tuvar degen ataylar,
Siz oturup erinşek ceniz tek,Memet’ten şaylar,
NOGAY’ımdın sıprasını taslamanız molluktan.

Mehmet TAŞKIRAN

ALINTIDIR: Nogay bülteni
http://elmakurdu.forumup.com/viewtopic.php?t=1909&mforum=elmakurdu

ANA

Akamdın on kolusun,

Üyünün ak colusun,

El kayday bilse de ANA,

Sen merhamet tolusun.

Esigin aşıp, asını tizip,

bilmezsin heş arıp, gızıp,

El kayday okusa da ANA,

Sen taslarsın iygi cazıp.

Atam üyünün keyşegi,

Akamdın köngül şeşegi,

El kayday karasa da ANA,

Sen nazardın kök moyşagı.

Camgurda sensin, celde sen,

İygilerge bargan colda sen,

El kayday tınlasa da ANA,

Caksılagan her til’de sen.

Akam seni heş coymadı,

Atındı aytıp koymadı,

El kayday söylese de ANA,

Mamet ulın saga toymadı.

http://www.nogayturkleri.org/nogayturkleri/siirler_sinlar/anne_ana.html

SUVARLARIMIZ

Kosaklasıp kel Fırat’ban ey Dicle,

Cırındı barabar aytarmız biz Meriç’le,

Bavrımga kirirse eğer sinsi Firak,

Şakır suvurup alsın Kızılırmak.

Endi biz,bizge bolgan bosa angarya,

Tutasımızdı tasır biliniz Sakarya.

İssi dep kararsanız bir salkım cer,

Capcasıl,Yeşilırmak bizge ceter.

Kişkiy Asi bas kötergen tavlarga,

Çoruh taze umut aketir ballarga.

Heş bir Türk balası kayin bolamas,

Mannayına şarpar o vakıt üyken Aras.

Göksu dep atını salganlar onun,

Cırı boldu Anadolu Toros’unun.

Cuvsun curttu suvarlardın suvu,

Hepimiz Türk batiri Türk uvulu.

ALLAHIM

Kurbanlar şaldık Allah’ım saga,
Ol mahşarda bizdi maktamaga,
Dergah-ı indinde makbul kıl,
Columuz, barıp sende toktamaga.

Neşe künahlarımız bar bilesin,
Keşe,kündüz köngüller cılasın,
Sosu kurban yüzüsuvuna bayrı,
Biz kullarınga rahmet kılasın.

Rahmetinge,zerre mazaratımız,
Bizdi caksıla dep calbaramız,
Sosu mübarek künde cıynaldık,
Üyken,kişkiy affınga baramız.

Duvalar ettik,tutas meşidlerde,
Sadamız kosuldu üyken mürşidlerge,
Mammet tili boldu aytıyatırı barın,
Sen rahmet kıl,Nogay müritlerge

Mehmet TAŞKIRAN

KONGUL KONAKBAYLARIMA
Bir sevdam bar Nogay birliğine,
Kutlarınız cüregime dam boldu,
Sizdey aldıda cürgenlerime,
Bu könglüm birer vatan boldu.

Ayrıgısı cok tutas Nogay menim,
Üyken ak caprakta bir azakay menim,
Bolganda işim tonyaktay menim,
Sizin süygünüz maga corkan boldu.

Barıp gurbette sizge coldas bolsam,
Karib Nogayımdın sıprasına as bolsam,
Mammet atım öser,işinizde tös bolsam,
Eki cihanda könglünüz,maga mekan boldu.

NOGAYIM
Men hep seni sagındım,seni bekledim,
Artında sen dep,her esikti cokladım,
Şekarada turup catırgıdı tıkbadım,
Kel endigisi köngül şeşegi Nogayım.

Mamleketler gıdırıp karadım ızındı,
Meni süyündürgen eki satır cazındı,
Basımızga bas etsek uvılındı gızındı,
Kel endigisi avuldın aşıgı Nogayım.

Küyler ayttık atınmınan,taslarga,
Kabar ciberdik tutas adanaslarga,
Mammet ayttı batirligindi caslarga,
Kel endigisi törümdün yakışıgı NOGAY’ım

CASLAR
Ak caslar akıllı caslar,
Nogayga Nogay kerek,
Ak basında kekilli caslar,
Nogayga Nogay kerek.
Tiliniz ayaman aguv,
Lapınız biyik,esiginiz enkuv,
Sizsiz bolmaz biyikke şıguv,
Nogayga Nogay kerek.
Kaleminiz ak cazsın,
Artınızga pek cazsın,
Birbirinizge kerek cazsın,
Nogayga Nogay kerek.
Ölüm birev,ömirde,
Şürür bolsa temirde,
Birbirinzidi taslamanız şamırda,
Nogayga Nogay kerek.
Azakay aytıp,köp anlanız,
Cırımızdı birge tınlanız,
Mamet ininizdi ınanız,

Nogayga Nogay kerek,

TINLA BALAM

Bir keşe sındırdılar esigimizdi,

Şıgarıp tirkediler avgunga,

Bala, şaga tutas hepimizdi,

Sürdüler karatbay artımızga.

Aş, suvsuz kıstın aşşı suvugunda,

Sürgün boldu Nogayım özcurtunda,

Kane kaysı sonlardın adem balası,

Şoşgalar adam tuvul basbelası.

Cartısı nogaydın karasuvga tökülüp kaldı,

Azakay bir camaat Romanga bardı,

Üş, beş ömür Köstence’de toktadılar,

Songna anacurtum dep Türkiye’ge bardılar,

Atalar, analar cetgereyik dep ballardı,

Cayav, calangaş cürdüler so collardı,

Ana tuvma, kökregin aşıp Anadolu,

Kel cürekbasarım dedi, Türk’tün Nogay ulu,

Sen maga Kudaydın bergen berk balası,

Keldinde tamam boldu endi Türk kalası,

Endi topban da cıgılmaz o ayzan kala,

Cüregi kan tolu, o şırayı solgun bala,

Tınla ey dünya TÜRK-NOGAY’dın sesini,

Tırıstırırmız kem atasıbasgadın celkesini,

Ballarımız endi birevbirevin arkalar,

Aldımızda koyan bolur sosu şoşgalar,

Enkeymedik şükür heş, taada enkeymezsik,

Tavesben şoşgalardı curttan tenkeymezsik,

Birev birevinmen tabıstı nogayım aruvge alamet

Tutasınızban küyezlenir, gardaşınız Mammet.

ÖTÜRÜK

Cazdın günü buz tutup,

Küzdün günü şeşek aşıp,

Dörtköşe dıgırşıklı arabası,

Peşte aşıgan, öptek şorbası,

Üytöbesi cerde, cerinde perde,

Kövdesi sıyakta, özü işgerde.

İndemey köp söylep bas avurtgan,

Şolagga ıslatıp, topaldı cuvurtgan,

Sokurga okutup, sangırga tınlatıp,

Arazdı cırlatıp, ölüdü küyletip,

Kıstın ortasında egin şalıp,

Aldında cürüp, artından cetip,

Terekke şıkkan ögüzge ot atıp,

Cayılıp cürgen itti, cipben cetip,

Uşun düşünüp, ötürük aytıp,

Akasının toyunda, gözermen suv tasıp,

Atasıman birge anasını ayttırıp,

Sosu künge cetken akşaşlı casbala,

Cüz yaşap, on turgan kasgabala,

Atandın ösiyeti bar maga senin uşun,

Ömür urlap akeliyiksin menim uşun,

Anan tuvgan künü aytgan cırındı,

Avuldun ortasında mamleketge tınlatıp,

Tutas bilgen küylerindi balana şınlatıp,

endi ceter de turup ket karamannay,

Belkim kızar seni bilmegen camaat anlamay,

Uşun aytın akam, köp söyledim, işinizde,

Sav bolunuz cer berdiniz köşenizde,

Endi kımdım aytgan men tuvulman,

Cestan, Comboyluk, NOGAY uvulman,

Soga küyezlenip cırlap, şıngladım,

Şugul cürüp, tutas coldu arşınladım,

Tavesildi endi lapımız, sözümüz,

Mıtılsa da NOGAYBALASI özümüz.

Sizge selam akeldim, NOGAYLAR.

Bır uzak coldan, Tengri Tavından,

Sizge selam akeldim, Nogaylar.

So biyik tavdın Altay kolundan,

Sizge selam akeldim, Nogaylar.

Akıp barkan Terekli suvdun basından,

Tutas Altaylardın Korkut Atasından,

Konup köşgen tutas Nogaybalasından,

Sizge selam akeldim, Nogaylar.

Tavdı iritip colga şıkkanlardan,

Kem söylegenlerdi cıkkanlardan,

TÜRK-NOGAY otunu cakkanlardan,

Sizge selam akeldim, Nogaylar.

Şorabatırdın Tin’indeki tastan,

Sonda kalgan Nogay adanastan,

Sizdi sagıngan üyken akbastan,

Sizge selam akeldim, Nogaylar.

Kubuvul aytatagan atalarımızdan,

Şırbörek casagan kartabalarımızdan,

Örende bosa curtumuzga karaganımızdan,

Sizge selam akeldim, Nogaylar.

Köstengildin şayırından, hüyügünden,

Siydametli yaylasının biyiginden,

Mandıra Nogayları cıyıgından,

Sizge selam akeldim, Nogaylar.

Sekerdin argavulu, bergeavulundan,

Tiyip turgan Agin, Kırkkuyuludan,

Karakura yaylası, Paşatavludan,

Sizge selam akeldim, Nogaylar.

Abozgada uğradım onlardan da,

Ahmediye, Rıpkıye, anavlardan da,

Mehmet’tin atını mıtkanlarından da,Sizge selam akeldim, NOGAYLAR.

TOKTASIN ZULUM

Cangan otları, suvsuz topraklardın,

Camguruman vicdanlardın, toktasın,

Curkulması fidanlardaki capraklardın,

Utanganıman insanlardın, toktasın.

Tas atıp temir toktatgan ballardın,

Aman tilegen sosu körpe tillerdin,

Kesek ezgen temirli kollardın,

Sındırması, merhametinmen toktasın.

Şehit bolmaga cuvurgan caslardın,

Üstüne aguv tökülgen aslardın,

Avzu köpürgen, azgın sosulardın,

Kabarganı, gazabınman toktasın,

Paygambardın tuvgan curtundan,

Sosu petrol degen dünya dertinden,

Zulümcülerdin casından, kartından,

Korku kirip işine, senden toktasın.

HAKKA TAMAAN

Ayyamay cangan işim, tımmaydı,

Ceter endi desem de, kımmaydı,

Bir kıyın zulüm etipsin, sıymaydı,

Tur özünge kel desem de koymaydı.

Bıyalalar betimdi köstermez boldu,

İşime canık caralar, kirip toldu,

Endigisi coyttum kaytıyak coldu,

Ne tömen, ne cogar heş bolmaydı.

Keşedin karangasında künümsün,

Keş kaldım artından ökünümsün,

Barın savlık, cogunman ölümsün,

Sen ketgen son dünya kalmaydı.

Körmepti tagaa sendey segiz avul,

Artında halek boldu neşe cigit uvul,

Atınga tizildi avuzlar tolu kubuvul,

Bavrı canıklar tınlap, tınlap toymaydı.

Endi destan boldu seninmen atım,

Mahşarga kaldı gayrım muratım,

Sevdandır bilki menim sıratım,

Künde on keşşem de saga barmaydı.

Haktır endi saga saklangan anavı,

Bir cır kelir bundanson elge tınlavı,

Körgeni sen tuv, endi közdün karavı,

Seni aytsa da sözleri, duvrusu kudaydı.

Barlıkta seni körsün, coklugu Hak’tır,

Seni süyüp işi, özge özü şıkbaktır,

Közlerindeki fer bilem hak uşun şıraktır,

Cüregini endi baska otlar cakbaydı.

Şakırsa da meni, eki alem bir bolup,

Hakka barır endi her söz col bolup,

Sandıraklar her keşe, atını bir bilip,

Bu vakıttan son maga, sen şıkbaydı.

Turduk barıp gayrısı, hak kapısına,

Tizildik barabar, hal arkasına,

Tökülsek de barıp köl ortasına,

Bir damla suv, bizden cerge akbaydı.

Menlimen, aytbasam da meni tanırsınız

Hakdı menden avel tutasınız bilirsiniz,

Şakırdım davat etip inşalla kelirsiniz,

Siz bolmadan asta, suvta bizge cukbaydı.

MUNGAYDIM

Terezeden karap kaldım artından,

Kayzaman keri kelirsin dep, mungaydım,

Ne tavesilmez dert eken basımdan,

Men de özünü saga bergen bir Nogaydım.

Keşe boyu esimde turdun catalmadım,

Şakırdı tenglerim canlarına ketalmadım,

Sevdandı iynimden sögüp, atalmadım,

Takatım tavesildi tizlerime şonkaydım.

Bir üyken tav ekensin, basın kökge tiygen,

Barı cürek senin uşun canıp canıp, küygen,

Gözlerindin işinde cok boluptu, bu süygen,

Vakıt cetti, kara maga canbetime cantaydım.

Endi bir atımda cok şakırsalar meni aytıp,

Bir sıngar cürekte cok maga barmaga kaytıp,

Artında cürdüm carasyak dep, kindi mıtıp,

Özün ösüp ketipsin, saga boşuna enkeydim.

SAYIRLIKKA CUN CAYDIM

Şayırlıkga cün caydım,

Künde kurusun dep,

Byik cerge üy saldım,

Süygenim otursun dep,

Col bolur barıp kelirsen,

Sosu menim de üyüm dersen,

Kelmege kıynalıpsın magersem,

Kayday süygü bar bir körsen.

Anam ayttı alıyakban dep,

Esigini anıyaka salıyakban dep,

Bayramlarda barıyakban dep,

Akam ayttı sizge karıyakban dep.

Cıynalıp bardık caslar,

Cünündü şırpbaga,

Adam bayrı col taslar,

Adasbay üyündü tabbaga.

Col eteyim bara kele,

Üyümdü akan akele,

Anang gızdı maga bir kere,

Bunday süygü, kara cerge.

Ayttırıp keliniz aşe barayım,

Cabıvlı esikti men aşayım,

Bayramlarda as casayım,

Kartayganda akana orun casayım.

SIIR

Gıdırıp şıgıbedim Nogay köylerdi,

Köstengilde şay berdiler, Sekerde kımız.

Cuvarayürüp toylanız toylardı,

Kırkuydan kiyev, Aginden gızımız.

Atam aytganday Siydametli biyik,

Karakuradın cancagıda hüyük,

Birevimiz şalıp, birevimiz söylüyük,

Kolumuzda, kobuz degen sazımız.

Abozdun şalkamaları cıpcıllı,

Kölbasını tapgan eki akıllı,

Calgız Memet bu segiz avullu,

Köbümüz ketgen. Mandırada kalgan azımız.

CANGI KUN

Cangı kün barınızga kutlu bolsun,

Anda tuvganlar daim mutlu bolsun.

Tutas Nogay cıynalıp cangıkünde,

Aldında cürsün barı Türk’ünde.

Atlarınız ak, collarınız carık,

Pikirleriniz pak, kalemleriniz carık,

Adasbasın Nogayım, künü carık,

Bolsun, Nogay dünyam sagınganım.

SINLAR

Şakırtuvsuz toyun bar,

Kozudan avel koyun bar,

Elding astında orun bar,

Men calangaş cerdemen, körmeysin.

Tizilgen töbede şıtım bar,

Taptalgan cerde ızım bar,

Törkünşükte gızım bar,

Kılmısda ınanmapban, körmeysin.

Casvınız kayırlı bolsun,

Cigen degenin sav bolsun,

Bala üyret meni bilsin,

Kartlardın işindemen, körmeysin.

Ayemdin topragını captım,

Cüzünü berdim atamdın,

Maazini menedim saladın,

Canbetinde cüremen, körmeysin.

Kobuz şalıp, kanekiy tebip,

Kozu soyup, kolaba tizip

Cas üylendirip, gız berip,

Toy etip cürümüz, Sen kaydasın?

Keyşekler tizdiler töbedi,

Caslar taptadı üytebedi,

Keyşegimiz törkünledi,

Kılmıs berip cürümüz, Sen kaydasın?

Kişkiyimizge casav basladı,

Ciyeni kelip, şetten ısladı,

Taa körmepgoysun baladı,

Biz kart bolup cürümüz, Sen kaydasın?

Ayendin salası berildi,

Atan ondan avel ketgenedi,

Sol zamandır ses kelmedi,

Seni sorap cürümüz, Sen kaydasın?