3 Nisan, 2025
0 Comments
1 category
| Kırımtatar Halk Efsanelerinden : Çatalkaya Civarındaki Çeşme |
| Kırım Tatar Halk Efsaneleri |
| Alupka ve Mishornıñ ortasından dagdan aqıp kelgen Hastabaş ozeniniñ yalısında bir qart oz qartiyinen beraber yaşay ekenler. Evleri pek harabe alğa kelgen. Elbet, qart endi duksan yaşında, qartiy ise seksen yaşında eken. Olarnıñ balaları oz bahtlarını arap, endi çoqtan dünya boylap darqalganlar. Kuçuk azbarda yetişken zarzavat ve bağça yemişleri qartlarnı yıl boyu baqqanlar. Qart olümi ep yaqınlaşqanını düya. Ekisi de oz olümlikleri aqqında tüşüneler, qasevetleneler. Künlerniñ birinde qart ormanga barıp, odun kesmege ve onı Alupka bazarına alt barıp satmaga, cenaze içün kerek şeylerni almağa qarar bere. Boylelikle, beline arqannı bağlay, eline baltasını alıp, yolga çıqa. Yavaş kete, soñ oturıp raatlana ve, niayet, Çatalqayaga barıp çıqa. Bayagı odun toplagan soñ, olarnı baglap, aşağı enip başlay;. Suvı Hastabaş ozenine aqıp tüşken çeşmelerniñ birine barıp yete. Sıcaq ava ve yo’rgunlıq qartnı taqattan kese. Biraz yal almaq içün odunını yerge taşlay ve çeşmeden suv içe. Közleri üqu çeke, bir kenarçıqta otura, üqlap qala. O uyanganda kuneş endi batığa dogrulğan, qonayata. Qart telaşlana, evge aşıqa. Odunnı kene sırtına ata ve, adeti uzre. oz-özünen seylene-söylene kete. Odun az alganım, üküm yengil, eki kere ziyade almaq mumkün edi, dey ozbaşına. Qartınıñ keç qalğanına telaşlanğan qartiy onı araştırıp, orman betke kete. Yolda sırtına odun üklü adamnı kore. – Balam, ormanda bir qart adamnı rastketirmediñmi? dep soray. – O da nasıl bala, közleriñ körmeymi yoqsa, qartiy meni tanımaysıñmı:.. – Men, qartiyni,küldürme,sen de qartayırsıñ. Menim aqayım yetmiş yıl evelsi seniñ kibi bir yaş edi. Qart işniñ asılını añladı. Demek, o bugun suvnı bir zamanlarda dedesinden eşittigi çeşmeden içip, yaşarğan. Elbet, qartiy de deral şu çeşmeden suv içmesi kerekti. Qart oña bu çeşmeniñ ne yerde olganını añlattı, ozü ise evge aşıqtı. Çünkü evde ozü yapacaq işlerni hatırladı. İşke berilip, ortalıqnı qaranlıq basqanını duymay qaldı. Aqılına aman qartiy tüşti. Çapa-çapa dağga ketti. Bir qaç daqqa içinde bir qaç saatlik yolnı keçti. Amma çeşme başında, kimse yoq edi. Qartiyini çoq araştırdı. Şaşmalap turğanda, çalılar arasında bir balanıñ aglavını eşitti. Balanı eline alıp, evine qayttı. Ertesi kunü balanı baqsa, o qartiyniñ çul-çuburına sarılgan. Demek, qartiy çoq yaşarmaga tırışqan ve qararını qaçırıp, şifalı suvnı pek çoq içken. Neticede yaşarmaq degil de, qundaq balasına çevirilgen. KALGAY dergisinden alıntıdır |
Category: 2008